autur: Martin Mathiuet
resumau da: Denise Simmen

Brabant era ina tiara lunsch encunter mesanotg. Suenter la mort dil retg da Brabant ei Elsa, sia suletta feglia, daventada regina. “Cun in bien cor, cun in maun franc e cun tut miu spért vi jeu survir a nossa tiara ed a nies pievel da Brabant”, quei ha ella empermess a siu bab. Mo per ch’ella sappi reger, han tut ils signurs dalla tiara stuiu engirar fideivladad ad Elsa.

In suenter l’auter ha engirau fideivladad alla princessa. Mo in buc. Telramund ha snegau quei engirament ad ella. El ha detg: “Tiu bab ha dau tut in’autra incumbensa a mi. Suenter sia mort duei jeu prender tei sco dunna e mez surprender la cruna!” ...